ഉറങ്ങിക്കിടക്കുന്ന മീന്‍കുഞ്ഞുങ്ങള്‍

കോര്‍ണീഷിലെ
കല്പടവുകളില്‍
ഉറങ്ങിക്കിടക്കുന്ന
മീന്‍ കുഞ്ഞുങ്ങള്‍ക്ക്
വില പറയുന്നു
ചില തിരയിളക്കങ്ങള്‍

മുന്നില്‍
കെട്ടിയിട്ട തോണിയില്‍
കൂനിക്കൂടിയിരിക്കുന്നുണ്ട്
ഒരു മുക്കുവന്‍
ഊളിയിട്ടുപോകുന്ന മീനുകളുടെ
തൊണ്ടയില്‍ തന്നെ
ചൂണ്ട കോര്‍ത്തെടുക്കാന്‍

പുല്‍ത്തകിടിയില്‍
ഒരു കുഞ്ഞുവിമാനം
‘മീമി മീമി’ എന്ന് പേര് പറഞ്ഞ്
വിടര്‍ന്ന കണ്ണുകള്‍ കൊണ്ട്
മാനം നോക്കി നിക്കുന്നുണ്ടായിരുന്നു