ഈ നട്ടുച്ചയെ
എങ്ങനെ
നേരിടണമെന്നത്
നിന്നില്‍ നിന്ന് വരുന്ന
പ്രഭാതത്തിന്റെയോ
നിന്നിലേക്കോടി മറയുന്ന
സായാഹ്നത്തിന്റെയോ
പണിയേ അല്ലെന്ന് തോന്നും
ഇക്കാലത്ത്
ഈ ദേശത്ത്
അവരുടെ നില്‍പ്പും ഭാവവും
കണ്ടാല്‍ !
സങ്കടങ്ങളെ
സുഖമുള്ള ഓര്‍മ്മകള്‍ കൊണ്ട്
നേരിടേണ്ടതെങ്ങനെയെന്ന്
ഞാന്‍ തന്നെ പറയാം നിന്നോട്...
കണ്ടില്ലെന്നും
കേട്ടില്ലെന്നും
നടിച്ചാല്‍
തീരാവുന്ന പ്രശ്നമേയുള്ളൂ
എന്ന ലളിത സമവാക്യത്തില്‍
തളച്ചിടാനാവാത്ത ജീവിതം
ഒരു യാത്ര പോകുന്നു
തെക്കോട്ടെന്ന് മനസ്സും
വടക്കോട്ടെന്ന് ശരീരവും
വടം വലിക്കുന്നൊരു യാത്ര.
മണിക്കൂറുകള്‍
വൈകിയോടുന്ന
ഈ മരുഭൂമിക്കാലത്തെ
മറികടക്കാന്‍
ഇനി എത്ര യാത്രകള്‍!
